Books LIVE Community Sign up

Login to BooksLIVE

Forgotten password?

Forgotten your password?

Enter your username or email address and we'll send you reset instructions

Books LIVE

NB

@ Books LIVE

NB Latest

Francois Smith gesels oor Kamphoer se hoofkarakter, Susan Nell (Plus: Video)

Kamphoer“My boek gaan ook ’n bietjie oor waarom ’n mens by sekere verhale aanklank vind, waarom die behoefte om spesifieke stories oor te vertel. In hierdie sin betrek dit dan ook daardie hoofkarakter, Susan Nell, se behoefte om haar verhaal oor te lewer, of dan ’n besondere weergawe daarvan – háár weergawe daarvan, ’n verhaal wat in alle opsigte háre is.”

Só het Francois Smith aan Jonathan Amid vertel oor sy jongste roman, Kamphoer.

In die artikel gesels Smith oor sy navorsing vir Kamphoer, sy skryfproses en die proses om ’n ware verhaal in fiksie te omskep. “Ek het met die skryf hiervan gedobber tussen uiterse wanhoop en ’n vae gevoel dat ek iets bereik het,” sê Smith. “Ek is ontroer en oorweldig deur die reaksie van resensente sowel as doodgewone lesers.”

Lees die artikel:

Watter uitdagings was daar verbonde aan die skryf van ’n verhaal wat nie net met die uiters subjektiewe ervarings van ’n vrou te make het nie (hier dink ek natuurlik aan verkragting, maar ook die ervarings van verskillende vorme van liggaamlikheid en emosies), maar ook aan die uitbeelding van die verskillende ruimtes en gedagtewêrelde van karakters soos wat dit aan die begin van die 20ste eeu en later tydens die twee Wêreldoorloë sou gewees het?

Dit is nou, ná die skryf van die boek, vir my moeilik om hierdie vraag te beantwoord. Daar moes ’n stadium gewees het, sekerlik net voordat ek daardie eerste woorde getik het, dat ek byna verlam was deur die besef van die waagmoed wat dit gaan verg, die vermetelheid daarvan. Een ding wat ek vooraf besef het, was dat ek nie uit ’n ouktoriële perspektief sou kon skryf nie – ek sou nie vanuit die hoogte op die karakters en hul wêreld kon neerkyk nie. Daardie vertelperspektief sou ook noodwendig in my geval ’n manlike perspektief wees, die begerende manlike oog wat alles wil sien en alles deurgrond. Ek moes die vertelperspektief afbring aarde toe, op ooghoogte vestig en deur die oë van my hoofkarakter na die wêreld kyk. Die ruimtes is dus deurgaans subjektiewe ruimtes, soos gesien en ervaar deur die gemoed van daardie karakter. Dit het dus altyd die kleure van haar gemoedstemming, en dit is beslis nie altyd donker nie.

Smith en sy broer Charles Smith het met Therese Benade op Kwêla gesels. Charles het eers met Nico Moolman se The Boer War in aanraking gekom, die grondslag vir Kamphoer.

“Wat ek dadelik besef het is hoe uitsonderlik dit is dat ’n verguisde vrou die kans kry om wraak te neem en ek dink dit is iets wat mens ’n behoefte aan het – die behoefte dat mense wat platgedruk is weer kan opstaan,” sê Smith. “As jy ’n skrywer is dan wil jy eintlik agterkom wat sou gebeur het as iemand, as ’n vrou veral, die geleentheid kry om in kontak te kom met iemand wat haar vertrap het.”

Kyk na die video:

YouTube Preview Image

Boekbesonderhede