Die subtitel van Breyten Breytenbach se nuwe digbundel, Katalekte: artefakte vir die stadige gebruike van doodgaan, verwys na “dinge wat vir jou plesier gee en wat jy stadig weer bekyk”.

Die titel van die bundel kon netsowel “Opdrifsels” geheet het, het Breytenbach Maandagaand by die bekendstelling van die boek by die Breytenbach Sentrum gesê. In Katalekte word twintig afbeeldings, onder meer van Breytenbach se eie kunswerke, as ‘n integrale deel van die teks aangebied. Daar is ook sekere bekende Breytenbach-motiewe soos “16 September” en pampoene wat weer hul verskyning maak. Dus is dié boek beslis iets om stadig en met groot plesier te bekyk.

In gesprek met Louis Viljoen het Breytenbach oor sy pampoen-motief gesels. Dit kom van die verhaal “Die fascistiese pampoen” in Breytenbach se eerste kortverhaalbundel, Katastrofes, en sedertdien het Breytenbach se geboortedatum, 16 September, en pampoene by sy lesers sinoniem geword. Selfs toe Breytenbach in die tronk was vir die ondermyning van die apartheidsregering, het mense ‘n manier gevind om hom op 16 September te herinner dat dit “pampoendag” is. Breytenbach het ook vertel dat Adriaan van Dis een keer by ‘n prysuitdeling in die buiteland ‘n pampoen agter die podium uitgehaal het toe hy Breytenbach moes bekendstel.

“Dit het vir my ‘n bygelowigheid geword om ‘n pampoen in my verjaarsdaggedigte te gebruik,” het Breytenbach erken. “Dit laat my dink dat ‘n mens regtig nie te lank moet lewe nie, want hoeveel keer kan jy nou ‘pampoen’ in ‘n gedig gebruik?”

Dié amusante opmerking het die gesprek in die rigting van die temas van dood en verganklikheid in die bundel gestuur. Breytenbach meen “doodsangs” het “doodsvangs” geword in sy digkuns. “Dit maak dit minder angswekkend.”

Met die versreël, “Jy kan nie dat ‘n dronk man jou vertel van sy dooie vriende nie,” word die onderwerp byvoorbeeld humoristies aangepak in een van Breytenbach se gedigte wat tydens die geleentheid deur Antoinette Kellerman voorgedra is.

Kellerman het lewe aan Breytenbach se woorde gegee terwyl Schalk Joubert haar op die kitaar begelei het. Breytenbach het die aand afgesluit deur self ook uit sy werk voor te lees en by te dra tot die musikale begeleiding met sy “klapklips”.

• Laai dit nie? Kyk op YouTube

Kellerman dra nog ‘n gedig uit Katalekte voor:

• Laai dit nie? Kyk op YouTube

Die gehoor was bevoorreg om te luister hoe Breytenbach self sy gedigte voorlees, begelei deur Joubert en Breytenbach se eie klipmusiek:

• Laai dit nie? Kyk op YouTube

Carolyn Meads (@CarolynMeads) het regstreeks vanaf die bekendstelling met #livebooks getwiet:

• Volg Carolyn Meads (@CarolynMeads) op Twitter vir nog twiets

Facebook-galery

• More snaps on Facebook

Boekbesonderhede

• Katalekte: artefakte vir die stadige gebruike van doodgaan deur Breyten Breytenbach
  Boek se tuisblad
  EAN: 9780798157926
  Spoor hierdie boek met BOOK Finder op!